تويت
استودع الشك في رجعته لأحلامي
وأكلم النفس في وصله وامنّيها
كثرت عليا الهجوس وزادت الآمي
لا عاده الله نهارن ماطلع فيها؟
دقيت طنب الغياب بسهلة ايامي
وخليت ليل الشقاء نفسي يعنيها
من يعشق من الهبوب الصلف والحامي
وش ياخذ من العجاج إلا سوافيها.؟!!
هذا انا من سنين وخاطري ضامي
ماهي غريبة دروب الحزن وامشيها !!
لكن كان الأمل في رغبة (أوهامي)
طيف وعبر قلت يمكن لي يعديها!!
عموم هذي جروحي وهذي اسقامي
وهذا رصيف الشقاء وهذي موانيها
متعود الضيق يفتح بابه الدامي
على ضلوع الألم لا حل طاريها
بميهاف هجره وطيت الشوك بقدامي
وتكدّرت من كؤؤس البين صافيها.؟!!
وانهد قصر الامل ثم عوّد ركامي
واجتاح ميدان صدري جيش خافيها
مايستر الزيف لو ملبوس الاكمامي
بعض المشاعر محك الوقت يجليها!
هذا انا ايه .. واقف .. وانسج إلهامي
على عتب خاطر الذكرى وأغنيها
مازاغ قلبي كثر مازاغت أحلامي.؟!!
واذا انطوت صفحة الغالين نطويها
تعليق